شهرزاد نيولوك

شهرزاد نيولوك

بلغنى أيها الملك السعيد, ذو العقل الرشيد, والجسم الشديد..

أن الكهرباء ستقطع من جديد, وهذه هى المرة الخامسة بالتحديد, فى هذا القيظ الشديد, وسنفطس كلنا أكيد...

 ناشدنا بالأمس حكيم المدينة, أن يرحم أمنا المسكينة, ويوفر لنا الكهربا بنت اللذينا, حتى نتهنى على أكله متينة, بدون أضواء الشموع اللعينة...

وجائنا الرد فى الحال, أن هذا محال, وإن لم ننته عن هذا الجدال, سنصفد بالحبال, ونلقى من قمم الجبال...

 شكونا للبلاد, ودعونا رب العباد, أن يقينا فتنة الأوغاد, وننول المراد, ويأتى الميعاد, الذى نشحن فيه الآى باد, بدون خوف أو ارتعاد, من انقطاع الكهرباء المعتاد...

 وهذا ماجرى, وما حدث وسرى, فهل ياترى, سيأتى اليوم ونرى, تلك المدينة المقفرة, مليئه بالأضواء المبهرة, والأجهزة المشعللة...

 ويسود الضياء, ويعم الرخاء, وبرودة الأجواء, ونترحم من تلك الوكسة النكراء, التى ألمت بالبلاد العصماء, ونستمتع بالهناء والشفاء بعد الشقاء والبلاء...

وأدينا منتظرين, قاعدين وساكتين, شاكرين ومهللين, لذلك البطل المتين, الذى سيأتى على حصانه المعين, ويرفع ذلك الكوبس اللعين, وتضاء البلد المسكين, ونرى الأطفال الحلوين, يلعبون فى الشارع المكين.. كهربا شد الفيشه ياحسين.

ليه كل دا بيحصلى ليييه دا انا غلبااااااااااان

انا غلبااااااااااااااااااااااان

يارب انا مش عارفه كل دا بيحصلى ليه , اصحى من النوم متأخر اروح اغسل وشى الاقى الميه قاطعه ونبدء بقى اسطوره ياناس ياللى تحت اقفلوا الميه للناس اللى فوق , وعلى مالميه توصل واقول اما اقوم بقى اعملى حاجه دافيه اشربها الاقى الانبوبه خلصت اهئ اهئ 

بلاش نشرب حاجه انا هنوى الصيام .

انزل جرى علشان الحق المواصلات اللى بطلعلها ساعه بدرى عن ميعاد الشغل , الاقى العربيه حملت وقالوا اكتفينا وانا واقفه على الباب , خلاص مش مهم آخد العربيه اللى وراها , الاقى الناس بطلت تركب مواصلات ومفيش حد عاوز يمشى حتى جنب العربيه لحد اقفش فيه واركبه بالعافيه , ولما ربنا يفرجها الاقى السواق مقتنع ان كل راكب بيتخد واحد على حجره 
ياعم يهديك يرضيك يقولك معليش ياابله استحملوا بعض دا احنا اخوات , قولتله طيب وحياه الاخوه يااسطى وصلنا المره دى مجانا , عمل نفسع فاقد السمع !!!

اروح الشغل ولسه همسك القلم وامضى يقولى شطبنا يابيه , اقوله شطبنا ايه انت محل كشرى , يقولى الساعه عدت التاسعه صباحا , واروح وانا زى الباشا اعمل أذن ماهو الأذن للجدعان بردو .

اطلع فوق ادور على العامله تجيبلى فطار بدل الانبوبه اللى خلصت دى , الاقى العامله واخده اجازه مخدتهاش بقالها سنه , يعنى ياللى تتشكى فى معاميعك قفلت معاكى ولازم تاخدى اجازه النهارده ! ! لا تعليق

انزل انا زى الباشا اجيب باكو بسكوت واطلع اعمل كوبايه شاى بقى من المخزون بتاعى وامخمخ , الاقى علبه السكر فاضيه !!  قولت والله لاشربه من غير سكر , لقيت سلك الكاتل مقطوع  عااااااااااااااااااااااااااااااااااااااااااا

ليه كدا يازمن ليه ليله ليه 

مش هشرب شاى هشرب حاجه ساقعه , والحمد لله شربت الحاجه الساقعه ومطلعتش مسممه ولا حاجه وخلصت شغل وروحت واركب العربيه من هنا الاقيها عطلت !!

نزلت وركبت غيرها لقيت الازاز بايظ ولازم اقعد طول الطريق فى العربيه من غير هوااااااااا , قولت مش مهم يابت اهى كلها كام دقيقه ونروح .

روحت البيت الاقى بقى فيه عزومه وفيه فرح وفيه ضيوف والواد لسه صاحى من النوم  ومش ناوى ينام والتليفون عمال يرن وشويه وهيحصل غزو فضائى على السرير اللى هنام عليه .

ليه ياربى كل دا بيحصلى دا انا غلبااااااااااااااااااااان , دا انا حتى مبعملش حاجه فى حد خالص

يعنى يارب هوا مره كدا اتخانقت مع سواق التوكتوك علشان كان عاوز يستكردنى فى نص جنيه قامت كرامتى نئحت عليا وقولتله هوا جنيه ونص عاجبك عاجبك مش عاجبك هاتوا ^_^
ماهو يارب كان عاوزنى افك عشييين جنيه علشان نص جنيه وانا مش المنوفيه بردو والعرق بينأح 

ويارب بالنسبه للست بتاعت الخضار اللى اتخانقت معاها علشان ادتنى بطاطسايه بايظه , ماهو يارب كانت عاوزه تاخد 2جنيه على الكيلو طيب تدينى بطاطس حلوه بقى يعنى هيبقى كدا ووحشه كمان

ولا يارب انت بتعاقبنى علشان الراجل بتاع الملوخيه اللى قولتله نقيلى الملوخيه عود عود 
ولا علشان الراجل بتاع محل الملابس لما كنت مصممه اخد جيبه هديه على البلوزه اللى اشتريتها

يارب دا كل الحاجات دى بسيطه المهم فى الآخر القلب نقى نقاوه ميه النيل بالظبط وانت عارف قصدى بقى 

طيب دا انا حتى مبزعلش حد وبحب الناس كلها وبضحك فى وش الناس وبساعد اى حد يحتاج مساعده من غير مااخد فلوس ولا بيض ولا لبن ولا اى حاجه خالص

اكيد انت عارف يارب قد ايه ايه عطوفه صح  .................................................

اوووووووووووبس

النور قطع :(

الحب زى صنيه الكيكه المحروقه

الحب دا عامل زى الحته الطريه اللى فى نص صينيه كيكه محروقه , عارف انت لما تلاقى صينيه الكيكه اللى كنت بتعشم نفسك تاكلها مع كوبايه شاى فجأه اتحرقت فى الفرن علشان المدام كانت بترغى على الفيس بوك , ساعتها بتفكر ياترى تخبط نافوخها فى الشاشه ولا تلحق حته كيكيه متحرقتش , تقوم معدتك تقولك تعالى ناكل حته وبعديننخبط نافوخها

تقوم بقى تروح تاخد الحته اللى فى النص اللى لسه طريه كدا وملظلظه وتستمتع بيها علشان تنسيك السواد اللى حواليها

اهوا الحب كدا ,حاجه كدا بتخليك منتعش كانك لسه واخد دش فى عز الصيف , وتخليك تحس ان الدنيا حلوه والعصافير بتزقزق و النور مبيقطعش والميه مش معكره والعيال بقوا هاديين زى الملايكه وشغل البيت بيتعمل لوحده والشحروره مش هتتجوز تانى

وياسلام بقى لو الراجل اللى قاعد على الزرار بيحب , هتلاقيه رفع الكوبس ويقول بتحبنى تقوم مصر كلها منوره وينزل الكوبس ويقول مبتحبنيش وتلاقى مصر كلها ضلمت واحنا نقول ابوك على ابوها اللى يخرب بيوتكوا

الحب دا ياحلوين حاجه كدا تخليكى طول النهار بتسحى بالدموع علشان الاستاذ مكلمكيش النهارده وعلشان عمل لايك للبت الموزه طحن اللى عنده فى البروفايل وشويه وتفتكرى انه قال سلام عليكم لبنت فى جروب تقومى تشغلى اغنيه غلطه وندمان عليها وتبعتى له على الاسكاى كل شئ بينا انتهى :)

وياسلام بقى لو عملتى حاجه معجبتوش يقوم قافل التليفون فى وشك ويقولك عقاب ليكى مش هكلمك 3 ايام تقومى انتى تنهارى وتشغلى سبت حبيبى 3 ايام , انا بتقل مش قصدى خصام , صدق هوا وقال مخاصمنى , قاللى اليوم ب10 ايام

يابت اتقلى يابت انتى وهيا بلا حب بلا وجع القلب

اصبرى ياختى لما تتجوزى واهو ساعتها لما يقولك متكلميش فلان وكلمى علان يبقى ليه حق فى دا , مش البت اليومين دول تخلص 5 ابتدائى تقول مصاحبالى واحد معاها فى درس النحو ويقولها اوعى اشوفك تقولى للمستر ازيك مره تانيه , تقوله حاضر ياحمو انت تأمر , وتقولك بيحبنى ويغير عليا

دا انا اعرف واحده هبله صاحبها قالها اياك اشوفك بتكلمى ابوكى , قالتله حاضر ياحبيبتى بس بليز متزعلش منى انا ضايعه من غيرك , الهى تضيعى زى فرده الشراب اللى مش لايقين اختها 

يابنات انشفوا شويه مش اى حد يقولك بغير عليكى يبقى بيحبك ولااى حد يقولك اوعى تكلمى اخوكى يبقى هيموت عليكى ولا اللى يقولك هتجوزك لما ظروفى تتحسن يبقى بيحبك اصلا

اللى بيحبك مش هيحطك فى موقف وحش قدام نفسك وقدام اهلك
اللى بيحبك مش هيرضى يزعلك ويتمنى يموت قبل مايشوف دموعك
اللى بيحبك مش هيوجعك ومش هيقسى عليكى
الله بيحبك هيحب كل حاجه فيكى وهيحبك وانتى صاحيه من النوم
اللى بيحبك هيدخل من الباب مش على المواسير
اللى بيحبك يبقى جوزك وخطيبك واخوكى وابوكى مش لازم البوى فريند
اللى بيحبك هيراعى ربنا فيكى

# انشفى يابت منك ليها 
#انا مش قصير اوزعه انا طويل واهبل
# اكيد انا مش بكتب للست الحاجه اللى يعدى من هنا يحط بصمته 

الحب كرامه ياابو توكه ولبانه

بيقولك ياسيدى ان الحب مفيهوش كرامه , وطيب وحياه خالتك ان الحب اللى من غير كرامه ميعمرش ابدا .

الحب هوا اصلا كرامه , كرامه الحبيب من كرامه حبيبته وكرامه الزوج من كرامه زوجته

ازاى تقنعنى ان الحب مفيهوش كرامه , يعنى الواحد من دول يقوم رازع مراته قلم مخبرين تقوم هيا تجرى عليه وتقوله سونه ياسونسن جتلك اهو , يقوم هوا حادفها بطبق الفاكهه على نفوخها ويقولها انتى لزقه ياست انتى و مبتحسيش , تقوم هيا تقوله حبيبى الاسمر بحبه الاسمر , ونقعد طول الليل هوا يمرمطها وهيا تغنيله 

ياجدعان اعقلوها شويه , اللى يقبل على حبيبته الاهانه وجرح الكرامه ميبقاش حبيب اصلا , واللى تقبل على نفسها انها تكون انثى بلا كرامه فهى بعد كدا مش هتحترم نفسها ولا هتحس انها ليها اى قيمه .

الانسان لما يحافظ على كرامته هيعرف يحترم الاخرين , لكن لما يفرط فى كرامته واحترامه وقيمته فهوا مستحيل هيقدر انه يقدم حب او مشاعر 

نقدر نقول بطريقه تانيه ان الحب مفيهوش ضغينه وان الحب كله تسامح , يعنى فيه فرق بين حبيبه تسامح حبيبها على غلطه علمها او على شويه عصبيه او كلمه سخيفه طلعت وقت غضب  لكن مينفعش تسامح وتبرر وتستعطف وتتذلل علشان سعادته يتكرم ويوافق انه يسامحها  .

كل حاجه لما تبقى فى حدودها بتكون مقبوله لكن لما تزيد عن حدها بتكون سخيفه وغير مقبوله .

اوعى علشان بتحبيه تلغى كرامته وتسمعى لواحده تقولك الحب مفيهوش كرامه , روحى له واتحايلى عليه ولما يقفل الموبايل استنى لما يهدى وكلميه ولما يقولك كلمتين فى جنابك قولى حاضر ولما يقفل التليفون فى وش اللى خلفوكى وطى راسك فى الارض وقولى الامر امرك والشورى شورتك ياسى السيد .

احفظى كرامتك علشان محدش غيرك هيحفظهالك .

واللى يزعلك او يشتمك او يغلط فيكى اوحتى يضايقك , قوليله تعالالى ياابن المبقعه واعملى معاه الجلاشه وسلميه تسليم اهالى لاقرب نقطه شرطه وقولى شايل اشاره رابعه ^_^

بيقولك ياسيدى

بيقولك ياسيدى

بيقولك ياسيدى عايز تنتعش , قوم خدلك دش دافى واطلع لمؤاخذه فى الهوا علشان لما الهوا يضرب فى أفاك هتنتعش على طول .
طيب ياباشا اللى الميه عنده مقطوعه زى حالاتى وبنشرب نص الكوباه ونوفى النص التانى علشان مش عارفين الميه هتيجى امتى , انتعش ازاى انا بقى حضرتك؟

انا بقى اقولك ازاى , اقعد كدا وربع ايديك واتعلم يابنى.

انزل اشترى كتاب بيتكلم عن الميه والبحر والشعب المرجانيه وشويه صور للغردقه على شرم على ناس بتبلبط وانت اول ماتشوفهم هتنتعش على طول , وبكدا نكون وفرنا على شركه الميه .

طيب واحده تيجى تقولى انا جعانه ومكسله اقوم اعمل أكل _ زى حالاتى بردو _ أقولها وتتعبى نفسك ليه وتقومى تقشرى بصل وتفصصى توم

قومى كدا زى الباشا هاتيلك مقاله بتتكلم عن الاكل واشكاله والوانه واقعدى اتفرجى على الصور واغسلى ايديكى وقومى نامى .

زمان قالوا ان القراءه غذاء الروح , وهيا فعلا كدا وكان ليها اهميه كبيره جدا , لكن مع التقدم والتكنولوجيا اصبح الفيس وتويتر واخدين كل وقتنا والوقت الباقى على الواتس أب .

لما نتكلم جد هقولكم ان الانسان اللى مبيقراش يبقى ميعرفش حاجه عن الحياه

لان القرايه هيا اللى يتخليك تعرف الماضى فتتعلم من أخطائه وتعرف الحاضر فتستغله لصالحك وكمان تبنى المستقبل بناء عن الماضى والحاضر .

اقرا اى حاجه تقع فى ايدك طالما هيا صح ومش هتضرك بشئ , وابعد عن القرائات اللى بتبوظ  المخ وتخليه تافه وهايف

اقرا الحاجات الصعبه وافهم ربعها وبالتدريج هتفهمها كلها ومداركك هتوسع وفهمك هيكبر وكمان مخك نفسه هيبقى محل ثقه من الآخرين

اقرا وانتعش ياعم الحاج ^_^